♥ આહારમાં ઉપયોગી મીઠું ♥

→ ભોજનને સ્વાદિષ્ટ બનાવવા માટે તેમાં મીઠું નખાય છે. આપણે મીઠાઇ સિવાયની દરેક વાનગીમાં  મીઠું નાખીએ છીએ. મીઠા વિનાના દાળ- શાક ફિક્કા લાગે આ જાણીતી વાત છે પરંતુ મીઠા વિશે કેટલીક નવાઇ ભરી વાતો પણ રસપ્રદ છે.

♦ આપણા શરીરમાં ૦.૨૮ ટકા મીઠું હોય છે. મગજમાંથી શરીર તરફ આવતા જતાં સંદેશા હળવા વીજ પ્રવાહથી થાય છે. તેમાં મીઠાની ભૂમિકા મહત્વની છે.

♦ મીઠું સમુદ્રનું પાણી સુકાઇ ગયા પછી  વધેલો સામાન્ય ક્ષાર છે. તેનું રાસાયણિક નામ સોડિયમ ક્લોરાઇડ  છે. આ બંને ધાતુઓ છે.

♦ દરિયાના પાણી ઉપરાંત કેટલીક જગ્યાએ જમીનમાંથી ખનીજ તરીકે પણ મીઠું મળે છે.

♦ મીઠું બેક્ટેરિયાનો નાશ કરે છે. ખોરાકને લાંબો સમય સાચવી રાખવા મીઠાનો ઉપયોગ થાય છે.

♦ તમને નવાઇ લાગશે પરંતુ ઇથોપિયા, તિબેટ જેવા કેટલાક દેશોમાં પ્રાચીન કાળમાં મીઠાના ગાંગડાનો નાણાંના સિક્કાની જેમ ચલણમાં ઉપયોગ થતો.

♦ પ્રાચીન રોમમાં સૈનિકોને પગારમાં મીઠું આપવામાં આવતું. પગાર માટેનો 'સેલેરી' શબ્દ 'સોલ્ટ' ઉપરથી બન્યો છે.

♦ જાપાનમાં શુભ કાર્યો કરતાં  પહેલા આસપાસમાં મીઠું  છાંટવાની પરંપરા છે. તેનાથી અનિષ્ટ તત્વો દૂર રહે છે. તેવી માન્યતા છે.

♦ ઠંડા પ્રદેશોમાં રસ્તા પર જામેલો બરફ દૂર કરવા તેની ઉપર મીઠું છાંટવામાં આવે છે. અમેરિકામાં ખોરાક કરતા રસ્તા સાફ કરવામાં વધુ મીઠું વપરાય છે.